ඇදහිල්ලේ ජීවිතයක් - මනූ මැතානි
March 16, 2025 Sunday Sermon Notes

අප නමස්කාර කරන්නේ මැරුණාවු දෙවිකෙනෙක්වත්, එක තැනක පමණක් සිටින්නාවු දෙවිකෙනෙක්වත් නොව, ජීවමානව වැඩවසන්නාවු සැම තැන්හීම අපව දකින්නාවු දෙවියන්වහන්සේය.

ස්වාමීන්වහන්සේ සැබෑවූ දෙවියන්වහන්සේය.

යෙරෙමියා 10:10
[10] නුමුත් ස්වාමීන්වහන්සේ සැබෑවූ දෙවියන්වහන්සේය; උන්වහන්සේ ජීවමාන දෙවියන්වහන්සේය, සදාකාල රජකෙනෙක්ය. උන්වහන්සේගේ උදහසට පොළොව වෙවුළයි, ජාතීන්ට උන්වහන්සේගේ උදහස දරන්ට බැරිය.

දෙවියන්වහන්සේ සදහටම රජතුමාව සිටින්නේ. නමුත් උන්වහන්සේ විනිශ්චය කිරීමට ප‍්‍රමාදය. උන්වහන්සේගේ අනුකම්පාව, අනුග‍්‍රහය මහත්ය.

දෙවියන්වහන්සේගේ උදහස ජාතීන්ට දරන්ට නොහැකි නිසයි උන්වහන්සේ යේසුස්වහන්සේව මෙලොවට එවමින් උන්වහන්සේගේ අනුග‍්‍රහය ලබාදී තිබෙන්නේ.

ඇදහිල්ල ඉතා අගනා දෙයකි. ඇදහිල්ල දෙවියන්වහන්සේ ප‍්‍රසන්න කරන අතර ඇදහිල්ල තුළින් අපට ජයග‍්‍රාහි ජීවිතයක් ගත කල හැකිය.

පාවුල් පැවසුවෙත් ඇදහිල්ලෙන් යහපත් සටනක් සටන් කරන ලෙසය. (1 තිමෝති 6:12)

පාවුල් අවසානය දක්වා ඇදහිල්ල රක්ෂා කළ බව පවසයි.

2 තිමෝති 4:7
[7] මම යහපත් යුද්ධයෙහි යුද්ධකළෙමි, මම දිවීම කෙළවරකළෙමි, මම ඇදහිල්ල රක්ෂා කළෙමි.

පාවුල් සේ අපද ඇදහිල්ල රක්ෂා කල යුතුය.
දේව වචනය තුළ අප පැවතීමෙන් අපට ඇදහිල්ල තුළ ගමන් කල හැකිය.

ශු. ලූක් 18:8
[8] උන්වහන්සේ ඔවුන්ට වහාම යුක්තිය ඉෂ්ටකරනසේකැයි නුඹලාට කියමි. එසේවී නුමුත් මනුෂ්‍ය පුත්‍රයා එන කල්හි පොළොවේ ඇදහිල්ල සම්බවේදැයි කීසේක.

අපගේ ඇදහිල්ල ක‍්‍රියාත්මකවන බව දැනගෙන අප ගමන් කල යුතුය.

දේව වචනයට කීකරුවීමෙන් අපගේ ඇදහිල්ල ගොඩනගා ගත හැකිය.

පොරොන්දු උරුමකර ගැනීමට අපට ඇදහිල්ල අවශ්‍යයයි.

හෙබ්‍රෙව් 6:12
[12] ඒ වනාහි නුඹලා අලස නොවී, ඇදහිල්ලද ඉවසිලිවන්තකමද කරණකොටගෙන පොරොන්දු උරුමකරගන සිටින්නන්ගේ අඩිපාරේ යන්නන් වෙන පිණිසය.

ඇදහිල්ල තුළ පැවතීමෙන් අපට හාස්කම් අත්දැකිය හැකිය.
අපව ශක්තිමත් කරමින් තදින් අල්ලා සිටින්නේ ඇදහිල්ලයි.

අපගේ ප‍්‍රකාශනය තදින් අල්ලා ගත යුතුය.

හෙබ්‍රෙව් 10:23
[23] අපේ බලාපොරොත්තුවේ ප්‍රකාශකිරීම චංචල නොවන පිණිස එය තදින් අල්ලාගෙන සිටිමු; මක්නිසාද පොරොන්දුව දුන් තැනන්වහන්සේ විශ්වාසවසිටිනසේක.

ඔබගේ අයහපත් වචන බල රහිත කරන්න.

ශු. ලූක් 17:5-6
[5] එවිට ප්‍රේරිතයෝ කථාකොට: අපේ ඇදහිල්ල වැඩිකළ මැනවයි ස්වාමීන්වහන්සේට කීවෝය. [6] ස්වාමීන්වහන්සේ කියනසේක්: අබ ඇටයක ප්‍රමාණ ඇදහිල්ල නුඹලාට ඇත්නම්, මේ ඇඹිල්ල ගහට කථාකොට: ඉදිරී මුහුදේ සිටවෙවයි කියන්නහු නම් ඒක නුඹලාට කීකරුවෙනවා ඇත.

ඔබගේ මුල් ඇද තිබෙන අයහපත්, අසාර්තක වචන වලට සමාව ගෙන මුල් වලින්ම ඒවා උදුරා ඔබගේ ජීවිතයෙන් ඒවා ඉවත්ව යන්නට අණ කල යුතුය.

ඔබ යාච්ඤා කරන දේ ලැබුනු බව අදහන්න.

ශු. මාර්ක් 11:24
[24] එබැවින් නුඹලාට කියමි–නුඹලා යාච්ඤාකොට ඉල්ලන මොන දෙයක් වුවත් ඒ සියල්ල නුඹලාට ලැබුණේයයි අදහන්න, ඒවා නුඹලාට ලැබෙන්නේය.

යාච්ඤා කරන දේ ගැන පළමුකොට දෙවියන්වහන්සේගේ කැමැත්ත සොයමු.

1 යොහන් 5:14-15
[14] උන්වහන්සේ ඉදිරියෙහි අපට තිබෙන නිසැකකම නම්, අප උන්වහන්සේගේ කැමැත්ත ලෙස යමක් ඉල්ලුවොත් උන්වහන්සේ අපේ ඉල්ලීම අසන බවය.

දෙවියන්වහන්සේගේ කැමැත්ත අනුව අප යාච්ඤා කලහොත් එය අපට සිදුවන බව නිසැකකමක් අපට තිබේ.

ශු. මාර්ක් 11:24
[24] එබැවින් නුඹලාට කියමි–නුඹලා යාච්ඤාකොට ඉල්ලන මොන දෙයක් වුවත් ඒ සියල්ල නුඹලාට ලැබුණේයයි අදහන්න, ඒවා නුඹලාට ලැබෙන්නේය.

ඔබගේ ජීවිතයට බාධා ඇති කරන පුද්ගලයන්ගෙන් ඉවත්වන්න.

රෝම 5:12
[12] එහෙයින් එක් මනුෂ්‍යයෙකු කරණකොටගෙන පාපයත් පාපය කරණකොටගෙන මරණයත් ලෝකයට ඇතුල්වුණාක්මෙන්, සියලු මනුෂ්‍යයන් පව්කළ බැවින් සියල්ලන් කෙරෙහි මරණයද පැමුණුණේය.

ව්‍යවස්ථාව නොදැන සිටියත් මරණය ජීවිතයේ රජකම් කරන ලදි. අප හරි දේ දැන ගත හොත් අප බන්ධනයකට අසුවන්නේ නැත.

රෝම 5:13-14
[13] මක්නිසාද ව්‍යවස්ථාව දෙන තෙක් පාපය ලෝකයෙහි තිබුණේය. නුමුත් ව්‍යවස්ථාවක් නැති කල්හි පාපය ගණන්ගනු නොලැබේ. [14] එසේවී නුමුත් ආදම් පටන් මෝසෙස් දක්වා, ආදම්ගේ වරදකිරීමේ ආකාරයෙන් පව් නොකළවුන් කෙරෙහි පවා මරණය රජකම්කෙළේය. ඒ ආදම් වනාහි එන්නාවූ තැනන්වහන්සේගේ ආදර්ශයක්ය.

හරි දේ දැනගෙන විශ්වාස කිරීම තුළින් ඔබට වහල් කමේ සිටිය යුතු නැත.

යෙසායා 5:13
[13] එබැවින් මාගේ සෙනඟ දැනුම නැතුවායින් වහල්කමට ගියෝය. ඔවුන්ගේ උත්තමයෝද බඩගිනි විඳිති, ඔවුන්ගේ සමූහයාද පිපාසායෙන් වේළී සිටිති.

බොහෝ අය සත්‍ය දැන ගැනීමට කැමැති වුවත් මනුෂ්‍යයන්ගේ බොරු විශ්වාස කරති.

අප අනුගමනය කරන්නේ කරුමය නොව ඇදහිල්ලේ කර්තෘ යේසුස් ක‍්‍රිස්තුස් වහන්සේය.

රෝග, හිගකම, ප‍්‍රශ්න දේව කැමැත්ත නොවේ.

දෙවියන්වහන්සේ අපට නියම කර තිබෙන්නේ යහපත් හා සෑම සම්පූර්ණ දීමනා පමණකි. දෙවියන්වහන්සේ අපට ප‍්‍රේමයෙන් මාර්ගය සාදා දෙයි.

යාකොබ් 1:17
[17] සෑම යහපත් දීමද සෑම සම්පූර්ණ දීමනාවද කිසි වෙනස්වීමක්වත් හැරීමේ ඡායාවක්වත් නැත්තාවූ ආලෝකවල පියාණන්වහන්සේ කෙරෙන් ඉහළින් බැස එන්නේය.

ඇදහිල්ල අපට උගන්වන්නේ යහපත් දේය.

දෙවියන්වහන්සේගේ හඬට කන්දීම වැදගත්ය. ඇදහිල්ල යනු දෙවියන්වහන්සේගේ වචනය දැනමුතුකමය.

හිතෝපදේශ 4:10
[10] මාගේ පුත්‍රය, කන්දී මාගේ කීම් පිළිගන්න; එවිට නුඹේ ජීවිතයේ අවුරුදු බොහෝ වන්නේය.

සුවසේ දීර්ඝ කාලයක් ජීවත්වීමට දේව හඬට කන්දෙමු.

දෙවියන්වහන්සේ එලියා යැව්වේ සාරෙප්තාවේ වැන්දඹු ස්ත‍්‍රිය ළඟට පමණි.

ශු. ලූක් 4:25-26
[25] සැබවක් නුඹලාට කියමි–එලියාගේ දවස්වලදී තුන් අවුරුදු සමසක් අහස පියවී, රට මුළුල්ලෙහි මහත් සාගතයක් පැවති කල, ඉශ්‍රායෙල්හි බොහෝ වැන්දඹුවන් සිටිය නුමුත්, [26] සීදොන් දේශයෙහි සරෙප්තාවේ වැන්දඹු ස්ත්‍රියෙක් වෙතට මිස ඔවුන්ගෙන් කිසිවෙකු වෙතට එලියා යවනු නොලැබුයේය.

දෙවියන්වහන්සේ දැන සිටියා එලියාව උන්වහන්සේගේ සෙනඟ ළගට යැව්වොත් ඔවුන් විශ්වාස නොකරන බව.

දෙවියන්වහන්සේ දැක සිටියා සාරෙප්තාවේ වැන්දඹුවගේ ප‍්‍රතිචාරය ගැන

දෙවියන්වහන්සේ තරතිරම් නොබලන දෙවිකෙනෙක් උන්වහන්සේ අදහන සියලු දෙකාටම එක ලෙස ක‍්‍රියා කරන්නේ.

ක්‍රියා 10:34
[34] එවිට පේතෘස් තමාගේ මුඛය හැර කථාකොට: සැබවින් දෙවියන්වහන්සේ මනුෂ්‍යයන්ගේ තරාතිරම් නොබලන කෙනෙක්ය.

එකි නෙක්කෙනාගේ ඇදහිල්ලේ ප‍්‍රකාරයට දෙවියන්වහන්සේ එකිනෙක්කෙනා තුළ ක‍්‍රියා කරයි.

පේතෘස් කොරනේලියස්ගේ ඇදහිල්ල ගැන පුදුම වුණි.

ක්‍රියා 10:2-7
[2] ඔහු භක්තිවන්තවූ, තමාගේ ගෙදර සියල්ලන් සමඟ දෙවියන්වහන්සේ කෙරෙහි භය ඇතුව සිටියාවූ, සෙනඟට බොහෝ දන් දුන්නාවූ, නිතරම දෙවියන්වහන්සේට යාච්ඤා කළාවූ කෙනෙක්ය. [3] ඔහු දහවල් නවවෙනි පැය පමණේදී දෙවියන්වහන්සේගේ දූතයෙකු තමා ළඟට එනවා සහ: කොර්නේලියස්යයි තමාට කියනවාත් දර්ශනයකින් පැහැදිලිලෙස දැක, [4] ඔහු දෙස ඇස් යොමා බලා, භයපත්ව: ස්වාමිනි, කිමෙක්දැයි ඇසීය. ඔහු කථාකොට: නුඹේ යාච්ඤාද දානද සිහිවීමක් කොට දෙවියන්වහන්සේ ඉදිරියට පැමුණුණේය. [5] ඉදින් යොප්පාවට මනුෂ්‍යයන් යවා, පේතෘස් නම් සීමොන් කැඳවාගන්න. [6] ඔහු මුහුද අද්දර සීමොන් නම් සම්කරුවෙකුගේ ගෙදර නවාතැන් ගෙන සිටීයයි කීවේය. [7] ඔහු සමඟ කථාකළ දේවදූතයා ගිය කල, ඔහු තමාගේ ගෙදර වැඩකාරයන්ගෙන් දෙදෙනෙකුත් තමාට නිතර මෙහෙකළවුන්ගෙන් භක්තිවන්ත හේවායෙකුත් කැඳවා,

දෙවියන්වහන්සේට භක්තියෙන් ඉන්න ඕනෑම කෙනෙක් උන්වහන්සේ පිළිගනු ඇත.

කොරනේලියස්ගේ නිවසේ අයට වචනය ඇසීමට මහත් පිපාසයක් තිබුනි.

වචනය අසා ඔවුන් අන්භාෂාවෙන්ද කථා කරමින්, වතුර බව්තිස්මයද ලබා ගන්නා ලදි.

ඇදහිල්ලෙන් සිටින්නා තුළ පූර්ණ දේව භයක් ඇත.

එලියාට කන්ට දුන් වැන්දඹු ස්ත‍්‍රියට සාගතය නිමවන තුරු කිසි අඩුවක් නොතිබුණි. (1රාජවලිය 17:13-16)

දෙවියන්වහන්සේට ළගාවිය හැක්කේ ඇදහිල්ලේ එකගවන ක‍්‍රියාවටය.

එලිෂාගේ දේශයේ සිටි කුෂ්ට රෝගින් එලියා පිලිනොගත්තත් සිරිය ප‍්‍රදේශයේ සිටි නාමන් තම අහංකාරකම ඉවතලා සේවකයන්ට කන්දී එලිෂා කී ලෙස යොර්දාන් ගගේ ගිලී සම්පූර්ණ සුවය ලබා ගන්නා ලදි. (2 රාජවලිය 5:10-14)

ශු. ලූක් 4:27
[27] අනාගතවක්තෘවූ එලිෂාගේ කාලයේදී ඉශ්‍රායෙල්හි බොහෝ කුෂ්ඨරෝගීන් සිටිය නුමුත්, සිරියාවේ නාමන් මිස ඔවුන්ගෙන් කිසිවෙක් පවිත්‍රකරනු නොලැබුයේයයි කීසේක.

අපගේ රක්ෂස්ථානය ඇදහිල්ලයි.

දෙවියන්වහන්සේගේ දීමනාව යේසුස්වහන්සේ තුළින් ක‍්‍රියාකරමින් නායින් නුවර මිය ගිය දරුවා ජීවත්වුණි. (ශු. ලූක් 7:11-17)

නමුත් මහලේ රෝගී ස්ත‍්‍රිය සුවවූයේ ඇයගේ ඇදහිල්ලෙනි. (ශු. ලූක් 8:48)

දෙවියන්වහන්සේට දීමනා තුළින්ද, ඔබගේ ඇදහිල්ල තුළින්ද ඔබට සුවය දිය හැකිය.

ඔබ යාච්ඤා කල කල්හී පිලිතුරු ලැබුණු බව විශ්වාස කල යුතුය. ඔබගේ විශ්වාසය තදින් අල්ලා ගන්න.

ශු. මාර්ක් 11:24
[24] එබැවින් නුඹලාට කියමි–නුඹලා යාච්ඤාකොට ඉල්ලන මොන දෙයක් වුවත් ඒ සියල්ල නුඹලාට ලැබුණේයයි අදහන්න, ඒවා නුඹලාට ලැබෙන්නේය.

ඔබගේ අදහා ගැනීම පැමිණිය යුත්තේ සුවය ලැබීමටත් පෙරය. යාච්ඤා කළ මොහොතේය.

අදහනවා යනු ඒ මොහොතේ පටන් ඔබගේ ප‍්‍රකාශය, ඔබගේ ක‍්‍රියාව ඇදහිල්ලෙන් පැවසීමය. එය විශ්වාස කිරීමය.

අපගේ නම ජීවන පොතේ තිබෙන බව අප විශ්වාස කල යුතුය.

එළිදරව් 13:8
[8] ලෝකය පටන්ගැන්මේ සිට මරනලද බැටළුපැටවාණන්ගේ ජීවනපොතෙහි නම් ලියවී නොතිබුණු පොළොවෙහි වසන සියල්ලෝ ඌට නමස්කාරකරන්නෝය.

යේසුස්වහන්සේ ස්වාමීන් කියා පිලිගත් අයගේ නාම ජීවන පොතෙන් මකා දමන්නේ නැත.

එළිදරව් 3:5
[5] ජයගන්නා නම් මෙසේ සුදු වස්ත්‍රයෙන් පළඳවනු ලැබේ; ඔහුගේ නම ජීවන-පොතෙන් කිසිසේත් මකා නොහැර, මාගේ පියාණන්වහන්සේද උන්වහන්සේගේ දූතයන්ද ඉදිරියෙහි ඔහුගේ නාමය පිළිගන්නෙමි.

යේසුස්වහන්සේ දෙවියන්වහන්සේගේ ප‍්‍රත‍්‍රයා කියා පිළිගත්තාවු කෙනා ජයගත්ත කෙනෙකි.

1 යොහන් 5:5
[5] යේසුස්වහන්සේ දෙවියන්වහන්සේගේ පුත්‍රයා බව විශ්වාසකරන තැනැත්තා මිස ලෝකයෙන් ජයගන්නේ වෙන කවුද?

අප ලෝකයෙන් ජය ගත් අයයි.

1 යොහන් 4:4
[4] මාගේ ප්‍රිය දරුවෙනි, නුඹලා දෙවියන්වහන්සේට අයිතිව, ලෝකයෙහි සිටින තැනැත්තාට වඩා නුඹලා තුළ සිටින තැනන්වහන්සේ උතුම් බැවින්, නුඹලා ඔවුන්ගෙන් ජයගෙන සිටින්නෝය. ඔව්හු ලෝකයෙන් වෙති.

පරාජිතයෙක්යැයි නොපවසා ඔබ ජයගත්තෙකු බව නිතර පවසන්න.

හිතෝපදේශ 4:11-15
[11] ප්‍රඥාවේ මාර්ගය මම නුඹට උගන්වා, හරිවූ මාවත්වල නුඹ ගෙනගියෙමි. [12] නුඹ යන කල නුඹේ පාද අවහිරනොවන්නේය; දුවන කල නුඹ නොපැකිලෙන්නෙහිය. [13] ගුරුකම තදින් අල්ලාගෙන, අතනෑර, එය තබාගන්න; මක්නිසාද එය නුඹේ ජීවනයය. [14] දුෂ්ටයන්ගේ මාවතට ඇතුල් නොවන්න. නපුරු මිනිසුන්ගේ මාර්ගයෙහි ගමන්නොකරන්න. [15] එයින් වැලකී, එහි නොගොස්, එයින් අහකට හැරී යන්න.

දුෂ්ඨයන්ගේ මාවතට ඇතුල්වුවහොත් ඔබගේ පරික්ෂාව වැඩිවිය හැකිය.

ඇදහිල්ලට විරුද්ධව නැඟිටින අය අතේ දුරින් ඇසුරු කරමු.

ඇදහිල්ලට බාධා වන කවුරු හෝ වෙවා ඒ අයගෙන් ඉවත්වන්න.

මම ඇදහිල්ල තුළ වර්ධනය වෙමින් අන්තිම දක්වා ස්ථීරව ගමන් කරනවා යන ස්තීරත්වයේ සිටිමු.

මනුෂ්‍යය බලයෙන් අපට කිසිවක් කළ නොහැක. පරික්ෂාවට අසුවන දුර්වල ස්ථාන වලින් අපි ඈත් වෙමු.

අපගේ ඇදහිල්ල ගොඩනගාගැනීමට, ඇදහිල්ල රක්ෂා කිරීමට අපි තෝරාගනිමු.

Watch the Sermon Video