ඔබගේ ගැළවීම තුළ ඇදහිල්ල - මනූ මැතානි
March 23, 2025 Sunday Sermon Notes

 
අපගේ ජීවිතයට යහපත කරන්නට, යම් දේ සපයා දෙන්නට දෙවියන්වහන්සේට විවිධාකාර මාර්ග ඇත. මෝසෙස් සමඟ සිටි සෙනඟට බොන්ට වතුර නොමැතිව සිටි අවස්ථාවේ අත්තක් කපා දමා එම වතුර මිහිරි බවට හැරවිය. (නික්මයාම 15:25)

දෙවියන්වහන්සේට හා මෝසෙස්ට විරුද්ධව කථා කළ සෙනඟට ගිනි සර්පයන් දෂ්ඨ කළ විට සෙනඟ ඔවුන් වෙනුවෙන් දෙවියන්වහන්සේට කන්නලව් කරන්නැයි මෝසෙස්ට කී විට පිත්තල සර්පයෙක් සාදා එල්ලන ලෙසත් ඒ දෙස බලන අය මරණයෙන් ගැළවී සුවපත් වන බවත් දෙවියන්වහන්සේ මෝසෙස්ට පැවසීය. (ගණන් කථාව 21:4-8)

මෙහි පිත්තල වලින් අර්ථවත් වන්නේ මනුෂ්‍යයා යන්නය. සර්පයා යනු යක්ෂයාය. යේසුස්වහන්සේ මනුෂ්‍යයෙක් වී කුරුසියේදී සර්පයාව සම්පූර්ණයෙන්ම පරාජයට පත් කර මනුෂ්‍යයන්ව ගළවා ගනු ලැබුවේය. යේසුස්වහන්සේව රාත‍්‍රියේ හමුවන්නට ආ නිකදේමුස්ට උන්වහන්සේ මේ ගැන පැවසුවේය.

ශු. යොහන් 3:13-15
[13] ස්වර්ගයෙන් බැස්සාවූ, ස්වර්ගයෙහි සිටින්නාවූ මනුෂ්‍ය පුත්‍රයා මිස වෙන කිසිවෙක් ස්වර්ගයට නොනැංගේය. [14] මෝසෙස් කාන්තාරයේදී සර්පයා එසවූ ලෙසම මනුෂ්‍ය පුත්‍රයාද [15] උන්වහන්සේ කෙරෙහි අදහාගන්න සෑමදෙනම, සදාකාල ජීවනය ලබන පිණිස ඔසවනු ලබන්ට ඕනෑයයි කීසේක. ‍

යේසුස්වහන්සේ කුරුසියේදී යක්ෂයාව සම්පූර්ණ විනාශකිරීම හා යේසුස්වහන්සේගේ කුරුසියේ පූජාව විශ්වාස කරන සියලු දෙනාටම සදාකාල ජීවනය ඇත. බොහෝ අය අද විශ්වාසය තබන්නේ වෙන්න තිබෙන දේ වැලැක්විය නොහැක යන මතයේය. ඔවුන් දෙවියන්වහන්සේගේ වචනය මත විශ්වාසය නොතබයි. යේසුස්වහන්සේව පිළිගත් සෙනඟක්ව සිටින අය විනිශ්චයෙන් නිදහස්ව සිටියි.

දෙවියන්වහන්සේගේ විනිශ්චයේදී එළුවන් හා බැටළුවන් වෙන්කරයි. එළුවන් වචනය අසන්නන් පමණි. බැටළුවන් වචනය අසා පිළිපදින්නන්ය. මේ ජීවිත කාලයේ අප තෝරාගත යුතුයි අප යේසුස්වහන්සේගේ වචනය අසා පිළිපදිනවාද නැතිනම් ප‍්‍රතික්ෂේප කරනවාද කියා. අප සදාකාල මරණයද නැතහොත් සදාකාල ජීවනයද තෝරාගන්නේ කියා.

ශු. යොහන් 5:24
[24] සැබවක් සැබවක් නුඹලාට කියමි–මාගේ වචනය අසා, මා එවූ තැනන්වහන්සේ අදහන්නාට සදාකාල ජීවනය තිබේ, ඔහු විනිශ්චයට පත්නොව, මරණය කෙරෙන් ජීවනයට පැමිණ සිටියි.

අප විනිශ්චයට පත් නොවන්නේ දෙවියන්වහන්සේ යේසුස්වහන්සේව අප වෙනුවෙන් විනිශ්චයට පත් කළ හෙයිනි. සැමවිට යහපත කළාවු යේසුස්වහන්සේට කුරුසිපත්වීමට සිදුවූයේ, දෙවියන්වහන්සේ මුලු මිනිස් සංහතිය වෙනුවෙන්ම යේසුස්වහන්සේව විනිශ්චයට පත් කළ හෙයිනි.

යේසුස්වහන්සේ පිළිගත් අයට මරණයෙන් පසුව විනිශ්චයක් නැත. ඔවුන්ට යේසුස්වහන්සේ යාමට ස්ථානයක් පිළියෙළ කර ඇත. අපගේ හොඳ ක‍්‍රියාවන් නිසා නොව අප යේසුස්වහන්සේ ස්වාමීන් කියා පිළිගත් නිසා උන්වහන්සේ අපව නොමිලේ ධර්මිෂ්ඨ කරනු ලැබුවේය.

ඔබ සභාවට ගියත්, කිතුනුවන් හොඳින් දැන හඳුනා සිටියත්, ඔවුන් විවේචනය කරත් ඔබ ගැළවීම ලබන්නේ නැත. ඔබ යටහත්ව උන්වහන්සේගේ පාප පූජාව පිලිගන්නා තුරු ඔබට කිසිදා නිදහසක් නැත.

හෙබ්‍රෙව් 9:27
[27] තවද එක වරක් මරණයත් ඉන්පසු විනිශ්චයත් මනුෂ්‍යයන්ට නියමව තිබෙන්නාක්මෙන්ම,

දෙවියන්වහන්සේ ඔබව විනිශ්චය කරන්නේ උන්වහන්සේගේ සුභාරංචියෙනි.

යේසුස්වහන්සේ පිළිගත් අය පළමු විනිශ්චයෙන් නිදහස්ය. දෙවැනි විනිශ්චය යනු යේසුස්වහන්සේව පිළිගත් පසු අප කරන්නාවු දේ වලට නියම කර ඇති විපාකය.

ආත්ම ශක්තිමත් කරනවාට, දෙවියන්වහන්සේගේ වචනයට කීකරුව ක‍්‍රියා කරනවාට මේ සියල්ලටම විපාක ඇත. සභාවන් දෙස බලමින්, මනුෂ්‍යයන් දෙස බලමින් ඔවුන් විවේචනය කරමින් ඔවුන් නිසා ඔබ යේසුස්වහන්සේ පිළිගත්තේ නැතැයි කියා ඔබට කිසිදා කිව නොහැක. ඔබ ගමන් කළ යුත්තේ සුභාරංචි වචනයට යටත්වී එයට කීකරුවීය. සුභාරංචි වචනය ප‍්‍රතික්ෂේප කරන්නන්ට ගැළවීමක් නැත.

ඔබ යේසුස්වහන්සේ පිළිගත් පසු අන්ධකාරයෙන් ආලෝකයටත්, වහල්භාවයෙන් මිදී යේසුස්වහන්සේගේ පුත‍්‍රයෙක් බවටත් පත්ව ඇත. ඔබගේ ජීවිතේ පසුතැවිලිවීමේ ඵල ඇත. ඔබේ ජීවිතේ වෙනසක් දැකිය යුතුය. ඔබගේ ජීවිතයේ අහිංසක බැටළුවෙක් බවට පරිවර්ථනයක් අවශ්‍යයයි. කිතුනු ජීවිතේ සුළු කරමින් අන් අය විනිශ්චය කරන්නෙක් නම් ඔබට ගැළවීමක් නැත.

ඔබගේ ජීවිතයේ කිසිදු වෙනසක් සිදුවී නැති බව ඵල වලින් ඔබට පෙනේ නම් ඔබ විනිශ්චයට සූදානම් නැත. ඔබ අන් අය රවටමින් ජීවත්වීමට දක්ෂයෙක් නම් ඒ දක්ෂතාවය ඔබව විනාශයට ගෙන යයි. රැවටෙන්නේ ඔබමය. ඔබ යේසුස්වහන්සේ පිළිගත් කෙනෙක් නම් ඔබ කොතැන සිටියත් ඔබ එකාකාර ජීවිතයක් ගත කරන්නේ. කැමති දේ කිරීම මගේ නිදහසයයි සිතන්නා බන්ධනයකට අසුවී සිටියි. අප කුමන දේ කළත් දෙවියන්වහන්සේ රැවටිය නොහැක.

ගලාති 6:7
[7] නොරැවටෙන්න; දෙවියන්වහන්සේට සරදම්කරන්ට කාටවත් බැරිය. මක්නිසාද මනුෂ්‍යයෙක් තමා වපුරන දේම කපා ගන්නේය.

දෙවියන්වහන්සේ සියල්ල දනී. උන්වහන්සේ ඔබට කැමති දේ කරන්ට ඉඩ දී ඇත. එහෙත් අපට විනිශ්චයක් ඇත.

දේශනාකාරයා 11:9
[9] තරුණය, නුඹේ යෞවන වයසේදී ප්‍රීතිවෙන්න; නුඹේ යෞවන දවස්වල නුඹේ සිත නුඹ සන්තෝෂකෙරේවා, නුඹේ සිතේ මාර්ගවලත් නුඹේ ඇස්වලට පෙනෙන හැටියටත් හැසිරෙන්න. නුමුත් මේ සියල්ල ගැන දෙවියන්වහන්සේ නුඹ විනිශ්චයට පමුණුවන බව දැනගන්න.

අප කරන සියල්ල දෙවියන්වහන්සේ විනිශ්චය කරනු ඇත. වපුරන දේ ඔබ කපා ගනු ඇත. එහෙත් ඔබ යේසුස්වහන්සේ පිළිගත් කළ යේසුස්වහන්සේ වපුරපු දේ අප කපා ගනු ඇත.

කුරුසියේ දෙපැත්තේ සිටි සොරුන් දෙදෙනාගෙන් එක්කෙනෙක් යේසුස්වහන්සේව සුළුකරන ලදි. (ලූක් 23:39-40)

යේසුස්වහන්සේ ඔහුගේ කීම් නොසලකා හැරීය.

නමුත් අනිත් සොරා පැවසුවේ අප මෙසේ සිටින්නේ අපගේ වැරදි නිසාය. නමුත් මුන්වහන්සේ එසේ නොවේය කියාය. ඔහු පැවසුවේ ස්වාමිනී ඔබගේ රාජ්‍යයට පැමිණෙන විට මාව සිහිකරන්න කියාය. (ලූක් 23:41-42)

ඔහුට ඵල කිසිවක් පෙන්වීමට අවස්ථාවක් නොවීය. එහෙත් යේසුස්වහන්සේ පැැවසුවේ අද දවසේ නුඔ මා සමඟ පාරාදීසයේ සිටින්ට යන බවය. (ලූක් 23:43)

ඔබගේ ගැළවීම සුළු නොකරන්න

ඔබ ගැළවීම ලබා ශුද්ධාත්මයාණන්වහන්සේ ඔබ තුළ වාසය කරමින් සිටී. ඔබ අවංක කෙනෙක් කියා කියන්න ඔබට පුළුවන් කම තිබෙන්න අවශ්‍යයි. ඒ ගැන විශ්වාසයක් ඔබ තුළ තිබිය යුතුය. අදහන සියලු දෙනා උන්වහන්සේ ලැජ්ජාවට පත් කරන්නේ නැත. ඔබ නොදැන යම් වරදක් සිදුවුවත් ඉබේම එයට කමාව ලැබෙයි.

1 යොහන් 1:7
[7] නුමුත් උන්වහන්සේ ආලෝකයෙහි සිටින්නා සේම අපිත් ආලෝකයෙහි හැසිරෙමු නම්, අපට එකිනෙකා සමඟ පංගුකාරකම ඇත්තේය, උන්වහන්සේගේ පුත්‍රවූ යේසුස්වහන්සේගේ ලේද සියලු පාපවලින් අප පවිත්‍රකරන්නේය.

ඔබ දන්න වරදක් සිදුකර තිබේනම් එය දෙවියන්වහන්සේට කියාදී සමාව ලබා ගත හැකිය.

1 යොහන් 1:9
[9] අපේ පාපවල් කියාදෙමු නම්, අපේ පව් අපට කමාකරන්ටත් සියලු අධර්මිෂ්ඨකමින් අප පවිත්‍රකරන්ටත් උන්වහන්සේ විශ්වාසව ධර්මිෂ්ඨව සිටිනසේක. අපි පව්කළේ නැතැයි කියමු නම්,

ඔබට පව් කියාදී ඉන් නිදහස් විය හැකිය.

හිතෝපදේශ 28:13
තමාගේ වරද සඟවන්නා සඵල නොවන්නේය; එහෙත් ඒවා කියාදී අත්හරින්නාට කරුණාව ලැබේ.

ඔබ පව් කියාදී එය අත්හැරිය කළ ඔබට කරුණාව ලැබේ. ඔබගේ නියම ස්වභාවය ඔබ දැන්ම දැනගත යුතුය.

2 පේතෘස් 2:20
[20] මක්නිසාද ස්වාමිවූ ගැළවුම්කාරවූ යේසුස් ක්‍රිස්තුස්වහන්සේව දැනගැනීමෙන් ලෝකයේ කිලුටුකම්වලින් මිදුණායින් පසු ඔවුන් නැවත ඒවාට පටලැවී වහල්වුණොත්, ඔවුන්ගේ පළමු ස්වභාවට වඩා අන්තිම ස්වභාව නපුරු වන්නේය.

දෙවියන්වහන්සේ ගැළවුම්කරු බව ඔබ දැනගෙන සිටියත් ටික කාලයකින් පරණ ජීවිතයට යන්නේ නම්, ඔහු දෙවියන්වහන්සේගේ නියම ගැළවීම ලබා නැත. ඒ අයගේ අන්තිමය වඩා නරක්වේ.

2 පේතෘස් 2:21
[21] මක්නිසාද ඔවුන් ධර්මිෂ්ඨකමේ මාර්ගය දැනගත්තායින් පසු, ඔවුන්ට භාරදුන් ශුද්ධවූ ආඥාවෙන් හැරීයනවාට වඩා ඒ මාර්ගය දැන නොගත්තා නම් ඔවුන්ට යහපත්ය.

හරි හැරීමක් වෙන්නේ නැති නම් ඔවුන් ගැළවීමේ පණිවිඩය නොදැන සිටීම වඩා හොඳය. (මතෙව් 12:43-45)

2 පේතෘස් 2:22
[22] බල්ලා නැවත උගේ වමනයටත්, නෑවාවූ ඊරී මඩේ පෙරළීමටත් හැරී ගියෝය යන සැබෑවූ උපමාවේ ප්‍රකාරයට ඔවුන්ට සිදුවී තිබේ.

ඔබ යේසුස්වහන්සේ පිළිගත් පසු පරණ ස්වභාවයට යන්නේ නම් ඔබ තුළ සැබෑ ගැළවීමක් නැත. සදාකාල ජීවනය අපට ලැබෙන්නේ මේ පෙළොවේය.

ශු. යොහන් 17:3
[3] සදාකාල ජීවනය නම් මේය–එකම සැබෑවූ දෙවියන්වහන්සේ වන ඔබ සහ ඔබ විසින් එවනලද තැනැත්තා වන යේසුස් ක්‍රිස්තුස් ඔවුන් විසින් ඇඳිනගැනීමය.

සදාකාල ජීවනය නම් යේසුස්වහන්සේව කව්ද මේ පොළොවට එව්වේ කියා පිළිගැනීමත්, යේසුස්වහන්සේව පිළිගැනීමත්ය. ඔබ සැබෑ ඇදහිල්ලේ සිටිනවාද කියා ඔබටම දැන ගත හැකිය.

2 කොරින්ති 13:5
[5] නුඹලා ඇදහිල්ලෙහි සිටිනවාද කියා නුඹලාම පරීක්ෂාකර බලන්න; නුඹලාවම සෝදිසිකර බලන්න. නොහොත්, නුඹලා එපා කරනලද තැනැත්තෝ නොවෙත් නම්, යේසුස් ක්‍රිස්තුස්වහන්සේ නුඹලා තුළෙහි වසන බව නුඹලාම නොදනිවුද?

යේසුස්වහන්සේ ඔබ තුළ වාසය කරනවාද කියා ඔබටම දැනගත හැකිය. දෙවියන්වහන්සේ බලන්නේ ඔබගේ සිතය.

1 යොහන් 4:17
[17] අප තුළ ප්‍රේමය සම්පූර්ණව තිබීම නම්, ඒ තැනන්වහන්සේ සිටින ආකාරයටම අපත් මේ ලෝකයෙහි සිටින බැවින්, විනිශ්චය දවස ගැන නිසැකකම ඇතුව සිටීමය.

සම්පූර්ණ ප‍්‍රේමය නම් ගැළවීමයි. යේසුස්වහන්සේගේ ආකාරයටද අප ජීවත්වන්නේ කියා දන්නේ නම් විනිශ්චය දවස ගැන අපට කිසි භයක් නැත.

1 පේතෘස් 3:20
[20] ඒ ආත්ම නෝවාගේ දවස්වලදී, නැව සාදන අතර, දෙවියන්වහන්සේ ඉවසිල්ලෙන් බලා සිටි කාලයෙහි අකීකරුව සිටියෝය. ඒ නැවට ස්වල්ප දෙනෙක් එනම් අටදෙනෙක් [ඇතුල්වී] වතුර කරණකොටගෙන ගැළවුණෝය.

නෝවාගේ කාලයේ අය ගැළවීම විශ්වාස නොකරන ලදි. ඔහුගේ පවුලේ අට දෙනා පමණයි ගංවතුරෙන් ගැළවීම ලැබුවේ.

කන්‍යාවන් 10 දෙනාගේ කථාන්දරයේ අවසානයේ තෙල් සොයා ආ අයට පැවසුවේ මම නුඹලා නාඳුනමියි කියාය. (මතෙව් 25:12)

අප පවිත‍්‍ර කරනුයේ දෙවියන්වහන්සේ ඉදිරියේ යහපත් හෘද සාක්ෂියයි.

1 පේතෘස් 3:21
[21] ඊට සමානව තිබෙන බව්තීස්මයේ වතුරෙන් එනම් මාංසයේ කිලිටුකම පහකිරීමෙන් නොව, යහපත් හෘදයසාක්ෂියකින් දෙවියන්වහන්සේ සෙවීමෙන් දැන් නුඹලාත් යේසුස් ක්‍රිස්තුස්වහන්සේගේ මළවුන්ගෙන් නැගිටීම කරණකොටගෙන ගැළවෙන්නහුය.

අප අදහාගත යුත්තේ වතුර බව්තිස්මයට පෙරයි. ඔබගේ යහපත් හෘදසාක්ෂියෙන් ඔබගේ සැබෑ ගැළවීම දැනගත හැකිය. සැබෑ ගැළවීම තුළ ජීවත්වන්නේ නව මනුෂ්‍යයෙක්ය. සැබෑ පරිවර්ථනයක් ඒ තුළ ඇත. අපි විනිශ්චය දවස ගැන නිසැකභාවයෙන් සිටිමු. කන්‍යාවන් දසදෙනා සූදානම්ව සිටියත් පස් දෙනෙක් නුවණ ඇති අයය. පස් දෙනෙක් නුවණ නැති අයය.

ශු. මතෙව් 25:2
[2] ඔවුන්ගෙන් පස්දෙනෙක් නුවණ නැත්තියෝය, පස්දෙනෙක් නුවණ ඇත්තියෝය.

නුවණ ඇති අය සැබෑ ගැළවීම තුළ ස්ථීරව සිටි අයය.

ශු. මතෙව් 25:3
[3] මක්නිසාද නුවණ නැත්තියෝ තමුන්ගේ පහන් ගෙනයද්දී තමුන් සමඟ තෙල් නොගෙනගියෝය.

නුවණ ඇති අය සැබෑ වෙනසක් තුළ සිටි හෙයින් ඔවුන් ක‍්‍රියාවන් හරි ලෙස කරන ලදි. එකවාගේ සිටියාට නුවණ නැති අය තුළ ගැළවීමේ ක‍්‍රියා තිබුණේ නැත.

ගැළවිම මිලයට ගත නොහැකි දෙයකි.

ශු. මතෙව් 25:10
[10] මිලේට ගන්ට ඔවුන් ගිය අතර මනමාලයා ආවේය; සෑදී සිටියෝ ඔහු සමඟ සරණ මංගල්‍යයට ඇතුල්වූවෝය. දොරද වසනලද්දේය.

මිලයට ගත් කිසිම දෙයක් දෙවියන්වහන්සේ ඉදිරියේ වටිනාකමක් නැත.

ශු. මතෙව් 25:11
[11] පසුව අනික් කන්‍යාවොත් ඇවිත්: ස්වාමිනි, ස්වාමිනි, අපට දොර හැරිය මැනවයි කීවෝය.

වටිනාකමක් තිබෙන්නේ යේසුස්වහන්සේගේ ලේ වැගිරීමෙන් ලැබුණු ගැළවීම තුළ පමණි.

ශු. මතෙව් 25:12
නුමුත් ඔහු උත්තරදෙමින්: සැබවක් නුඹලාට කියමි, මම නුඹලා නාඳුනමියි කීවේය.

යේසුස්වහන්සේ උන්වහන්සේගේ දරුවන් කව්දැයි කියා අඳුනති.
ඔබගේ ජීවිත රටාවෙන් ඔබගේ සැබෑ ගැළවීම ගැන දැනගත හැකිය. විනිශ්චය දවසට ඔබ මුහුණ දෙන්නේ කෙසේද කියා ඔබ දැන සිටින්න.

Watch the Sermon Video